قلت أنا وقال التاريخ وقالت بلادي.

اجبيني عالي .ثمينة سومي غالي
باهية بين البلدان لاحد بحالي
زاهية بالعز بهلي ورجالي
عمامة بيضة صايلة فوق لغمام
باهية شمسي ساطع اهلالي
صايلة المجد والصولة ديالي
مغربية بدر التمام
هوايا مسك والتربة اغوالي
من جالو فيا اسنين واعوام
عشقو بهايا تاهو فمجالي
غناو فالتيت شلا اقوام فاهو فجمالي
كريمة ساير ليام نخيل فواكه ودوالي
شامخة تنافس لغيام هذيك العالية اجبالي
صابرة اصبر لمقدام ما نحير فمصايب وهوالي
ليا سياد ليوث لاكام فالحرب نسور
او فالسلم حمام ديالي
ليا امجاد .. حروف تنير زباج الظلام
راسي فلعالي
سولو التاريخ يروي كلام
فالنخوة .العز ولمعالي
التاريخ اكتب بقلام وروا لي
اعيا من الكتبة والتزمام
مجدي علدوام واقف واعلامي يشالي
دوا التاريخ وكال بتمام
ديما مكفضة لكمام المجد بايعك من زمان بالطاعة يشالي
بين لكنوس فالهمة علام
الزمان بحمال فضايلك ينوء ويلالي يئن ويتألم
الشمس نارت ببهاك والشعا اقلام
ترسم لوان طيفك فسماك تلالي تتلآلأ
جاوبت بكليمات رقيقة نغام
هكذا أنا وهكذا الله بغاني
انعيش فالدنيا اعلام
اخضر فحمر يخفق فلعالي
تفديه بالدم انسام
يسقي بطيب المسك امجاليي
من جاني ضيف بصفة لكرام
نكرم ونزيد فلكرم ديالي
من جاني بالشر اغتام
يذوق الموت الزؤام
مانفرط فالحق ديالي
مغربية أنا علعدى نار ضرام
وعل لحباب سيرت لحمام
هذا مكتوبي ومقالي
احنينة نعشق السلام لمحبة ولوئام
فلحرب ليا كلام.
الموت أو النصر يرتع فمجالي
وليدي اسبع من لرحام
ليث ضرغام
سيف لفدا .. ارماح وعوالي
به صايلة علدوام
مغربية من طنجة لكويرة دوام
هكذا بغات لقدار وهكذا المولى بغا لي
احنيت على أرض بلادي قلت من قلبي كلام
ياأرض لخير..يا زينة لقوام
مالي أرض غيرك انت ديالي
نفديك يابلادي بدمي كيف لكرام
مانحير فلعدا ولا الموت الزؤام
نموت وتعيشي حرة يا أرض لكرام
وسالت دموعي اسجام
بست جبينها شميت عبير ارواح اجدادي
يصيحو من برزخ الغيب
المغرب أمانة يا ولادي
عزكم مجدكم لاتفوتوه لا تخليوه لعادي
وارفعت جبيني بإيماني ويقيني
والله يا جدادي ما نبيع زينة البلدان بلادي